有同事打電話上來要求安裝 photoshop. 其實裝軟件o既程序就好簡單, 我地都係睇下佢職位o既軟件列表, 同埋查下夠唔夠licence, 只要佢符合要求就會裝比佢. 但係打得上來問, 除非係我地裝機時漏左, 否則一係就想額外加新軟件, 一係呢就博大霧. 咁呢位同事其實係人事部員工, 佢o既工作照計就唔駛用 photoshop 架喎, 當然佢o既軟件列表冇呢一項啦. 但係我地就奇怪, 無理由佢咁大膽自己要裝新軟件, 同埋佢要來做乜野呢? 我地呢d 服務性行業, 當然係用戶為先, 於是派左位技工去問個究竟. 真相原來係人事部同事想將一幅 MS word 檔案內的圖轉做 jpg 格式, 佢以為 photoshop 可以將 doc 轉成 jpg, 所以就打上來要求安裝喇. 有好多時都係咁樣, d 同事會自己諗左一套佢認為行得通o既方法, 然後就向我地提出要求. 但係就唔直接話比我地聽佢地實質上想做乜, 或者遇到d 乜野問題. 我地雖然唔算得係專業, 但係話晒都日日對住千奇百怪o既電腦問題, 問下我地意見點都有d 幫助架嘛. 真係好唔明佢地點解咁鐘意做埋我地果份囉.
件事結果點處理? 咁就梗係唔會裝 photoshop 比佢啦, 既要入紙申請, 又要錢(計 licence), 而最重要o既係 photoshop 唔多幫倒佢. 我地剩係幫佢o係 MS word 按 copy, 再 paste 落"小畫家", 然後儲存成 jpg 檔案.
沒有留言:
張貼留言