點解生BB

最近老友們提到生仔, 其中一個老死語重心長咁同大家講: 唔好咁快做老豆呀!
大家當然問點解, 佢就話:
1) 你要100%專注落你個B 度, 你會失去你自己的生活.
2) 生仔後, 所有長過15分鐘o既嗜好/興趣都要放棄.
3) 你唔可以開OT, 做唔好功課又唔能夠好好讀書, 因為要分心照顧BB.
4) 你會失去你的太太, 因為佢變得只會做人媽媽.
5) 如果阿爸阿媽話幫手照顧BB, 咁就要面對沒完沒了的婆媳問題.
6) 要放棄飲酒, 因為這對BB不好.
7) 你所有o既錢, 儲蓄都要比晒個B
8) 你唔開心不能再同老婆呻, 只能o係度同d 老友呻...
---------------------------------------------------------

咁, 我又覺得佢悲觀了點, 而且他主要是向老友呻下. 不過咁, 我會想係咪咁非黑則白呢? 講到甚麼100%, 做了媽媽就不再是太太. 不可能吧, 應該有些比較平衡點的方法吧? 始終生兒育女是一種極高風險o既投資, 無論你幾努力, 做幾多野都好, 孩子總有自己的想法, 如果把一切押下去, 對誰都沒有好處啊. 我不是說不要盡心盡力去養育孩子, 但也別給大家太大的壓力, 自己也應該留一手退路吧. 雖然養育孩子應該是只管付出, 不求回報的. 但撫心自問, 你愛你的孩子, 你也一定期望他們同樣愛你吧.

其實我會想, 為甚麼大家會想生BB呢? 究竟為乜呢? 為了人類的生命繼代? 冇咁偉大呀? 因為"想"要? 咁點解會"想"先? 是責任? 對誰的責任? 自己? 家庭? 社會? 定係天性呢? 咁係咪人人都有呢種天性架呢?
不過, 無論點講都好, 如果你帶了一個新生命來這個世界, 這便是你的責任, 好好努力吧!

玩物喪志

朋友s 問: 假如有一日，您個仔／女打機打到好似我地以前咁樣（或者係依家咁樣），一番到屋即刻對著部腦打機，冇三四點都唔訓．．．如果係咁您會點？

講真, 我覺得無乜野, 尤其係佢自己都識話"好似我地以前/依家咁樣". 咁, 除非我地覺得自己而家好唔掂, 如果唔係, 照計唔會覺得有問題架喎. 即係咁, 我認為打機都只不過係一種嗜好, 其實諗真下, 換左唔係打機, 一番到屋剩係對住部電視, 或者剩係對住本小說, 又或者剩係寫blog, 又再或都剩係訓覺, 咁又有冇問題呢? 就咁, 你話晚晚玩到三四點就真係唔係咁好, 驚影響健康呀, 如果o係唔影響健康o既情況下, 開開心心咁玩下又有乜所謂呢?
至於算唔算沉迷, 我真係唔敢講, 我冇工返果兩年日打夜打, 但係再次返工之後, 仲邊有時間喎(唔知算唔算沉迷工作呢). 其實, 在人生的不同時間裡, 我們總會很投入的做某些事, 呢d 事可以對其他人來說毫無意義, 可是, 只要我們做得開心, 又唔影響到人, 當然亦唔好傷害到自己啦, 咁又何妨讓大家開開心心認真投入咁去做呢?
再講到做o既野有冇意義, 有時都好難講. 一般來說, 努力讀書, 努力工作都算係有意義, 而打機呀, 打波呀, 捉棋呀等等都會被定義為玩物喪志, 浪費時間. 不過咁, 其他人我唔敢講, 我大部份o既電腦基本知識都係因打電腦game而來. 我最記得我係因為要打doom先知道乜野叫network, 因為要打某d 好食ram o既game先知道 base, extend memory, multi-config(DOS)... 最後, 仲走左去讀CS, 有時d 野, 真係冇人估倒架.

現在的追求

朋友S 話佢剛剛正式踏入「黃金十年」，成日都惗吓「工作／事業」既問題。之前響書店睇左一本書，大概講「三十五歲前應有既態度」。其中有條大意係「不要為工作而努力；要為事業而努力」。

朋友D 就話現實社會那容許想那麼多?在身邊有這麼多東西這麼多事情這麼多身邊人會影響一個人的決定. 對佢來說,人到無求品自高都建基在先有雄厚財富,才能談理想.無$一切理想皆為空談.所以先追求$,安頓家人,才能追求理想.

朋友9 又話咁幾多先叫夠？分好多stage wor ....如果單身, 可能只要求身邊 d 玩樂工具, 如果married, 你要take care 你另一半要求, 如果有細路, 你要更多去 take care 小朋友要求... 所以點解好多人為左理想而唔拍拖結婚生仔 law. Once 你生左, at least 要take care 你小朋友 2x 年. 你可以問番你 father mother, 為左你條化骨龍佢地放棄左d mut 野, And then 而家佢地又可以做到 mut 野.

我就覺得如果可以不為生活而工作, 那已經很好了. 一定程度上, 我總覺得可以去想工作/事業甚麼的, 一定是已經擁有不少的了, 至少, 已經不是在金字塔底游來游去. 我想, 如果可以在工作上真真正正做到些"新"野, 而又對世界有幫助的話, 那麼工作便很有價值了.
但是, 對於要說父母為仔女放棄d 乜,我總是覺得怪怪的. 首先, 我並無認為父母不偉大, 但是, 生不生仔, 照不照顧, 也是自己決定的. 之後問返為仔女放棄左d 乜, 對仔女又似乎有d 唔公平播.
關於理想和錢, 我覺得關係並不太直接, 因為多多錢也不會令沒理想的人變得有理想. 當然, 不會餓死是基本! 理想嘛, 目標嘛, 是要先定立的, 然後一步一步努力去實踐. 不是得閒有時間又撞正才做, 是要盡力安排時間, 增取機會, 努力不懈才有意思吧.
而且, 說到追求d乜, 如果真的想到了, 好有可能要轉工, 進修, 或做很多不同的準備, 不先想清楚是不行的.
錢, 衣食住行, 家人, 朋友, 甚麼都好, 應該是在你走向前時要考慮的, 而不是你的拌腳石....
自古成功非偶然, 努力幸運, 天時地利人和缺一不可. 像我這樣, 從小沒甚麼理想, 也沒為達到甚麼目標而怎麼努力過, 但這並不代表設定目標, 計劃將來沒意義. 因為我有很多相識多年的朋友都真正地做到他小時候告訴大家的目標, 我也見証著他們是怎樣做到的. 問題只是, 究竟你想要得到甚麼? 而你又會如何去實踐?