同事芬姐前幾日無端端面黑黑, 對人呼呼喝喝發晒脾氣. 我地完全唔知發生乜野事, 為左保障大家o既人生安全, 以及維持一個安靜o既工作環境, 於是派出最強o既一哥去問個究竟. 起初芬姐死口都話冇野, 話自己冇發到脾氣, 一向都係咁做野喎. 後經一哥不斷試探, 才不經意爆出一句: 某部門小張升做經理喇. 原來, 芬姐係妒忌人地升職, 話人地坐直升機喎. 但係, 其實都幾難明, 因為小張係另一個部門o既人, 佢o既升遷唔會影響到芬姐o既前途, 咁為乜要唔高興呢? 原來芬姐感懷身世, 覺得自己為公司勞心勞力都冇職升, 見人地升做經理就眼紅唔抵得, 所以咪成日都唔開心, 口黑面黑囉.
其實呢d 都唔知乜野心態, 憎人富貴厭人窮, 人地升職又冇阻礙你, 你覺得自己付出左想要回報, 咪直接同公司講囉, 點解要聽到人地升職就向身邊o既人發脾氣呢? 咁係冇用架嘛. 同埋唔明點解佢成日覺得自己為公司犧牲左好多野咁, 我又唔見佢比其他人特別勤力, 做事也不見得特別快手, 返工又唔係話好準時, 真係唔明點解佢會覺得公司欠左佢咁囉. 不過好多人都係咁, 個個都想升職加人工, 但就唔會諗下自己究竟值幾多. 無計啦, 自大, 自卑何其多, 自信, 自知有幾個? 錢呢, 真係冇乜人會嫌多, 職位呢, 又有邊幾個會嫌高呢?
不過咁, 做人點幫自己爭取都冇問題, 但係就千祈唔好踩低人地來抬高自己囉.
沒有留言:
張貼留言