我用開果個顯示器今日無端端會閃下閃下, 突然又會黑晒, 突然又會好返好似無事咁. 最直覺就梗係諗住個顯示器到期啦, 話晒我都用左佢成五年幾, 之前仲要係第二個同事用o既, 都真係唔知用左幾耐. 不過呢, 就唔可以咁樣屈個顯示器有事, 因為我有用 KVM, 可能係佢出事都唔定. 咁我先試下將個顯示器直接連落部機度望下啦, 噢! 即刻有返野睇. 死啦, 唔通要換 KVM? 駁住成七部機架, 煩死. 但係都冇法子, 唯有換一個試下啦. 搞完一輪, 點知呢個都係冇野睇喎. 有冇咁神奇呀? 無理由咁橋兩個KVM都壞架? 會唔會係個顯示器太舊, 處理唔倒經過KVM後o既訊號呢? 於是又去搵個新o既顯示器試下, 發現病情完全一樣, 又係直駁好地地, 經KVM就冇野睇. 到呢一刻真係呆晒呀, 都唔知點算好. 諗下諗下, 有乜野係成個測試過程都冇換過呢? 終於醒起因為懶o既緣故, KVM個火牛係冇轉過架, 唔通火牛有事? 跟住條電線去到個火牛果度, 唉! 原來個火牛比野撞鬆左, 都冇電到... 插返佢落去, 即刻乜事都冇. 真係激死! 大家可能會奇怪冇電點會唔知架呢? 查實呢個 KVM 好怪, 只要插左電腦就會著燈, 唔駛火牛亦都可以轉slot, 兼且冇LED顯示電源情況, 所以我就一路都以為佢有電到囉. 唉! 失策失策!
呢個故事, 就係教訓我地千祈唔好忽略最基本o既野, 越係普通越唔起眼o既, 最易被人忽略, 但好可能呢d 先至係關鍵呀!
沒有留言:
張貼留言