睇新聞知道呢兩日都有好多人去東亞提款, 我本身就冇東亞戶口, 咁梗係唔駛諗咁多野啦. 但係同事問我如果有錢o係東亞度, 會唔會提返晒出黎呢? 起初我好快咁答左唔會, 第一我真係唔多信東亞有事, 第二係我怕麻煩, 莫講話走去排隊, 就算係網上理財轉來轉去我都嫌麻煩呀. 咁講真, 其實怕煩先至係主因. 之但係, 其他同事就話一定會去提款囉. 佢地話就算99% 係假都好, 如果咁唔好彩中左剩返果 1%, 就真係慘喇. 佢地仲話, 就算要花時間去排隊, 浪費o既都只係時間, 如果得閒就一定會去囉. 咁真係唔怪得會有咁多人走去排隊喇.
但係我就諗緊另一樣野, 其實間銀行都幾慘, 就算本來無事, 突然間咁多人去提款, 會唔會真係搞到出事呢? 咁死喇, 照咁樣諗落去, 如果我有錢o係佢度咪應該去提返出來? 驚佢因為太多人提款而出事嘛! 再諗多層, 原本我係果批唔諗住去提款o既都驚到去提o既話, 咁佢會唔會真係冇事都變有事呢?
所以話呢, 謠言o既威力係幾咁可怕!
沒有留言:
張貼留言