最近有幾樣野想買, 分別係GPS手錶, netbook, 相機, 以及手提電話. 買晒咁多樣咩? 我又有d 唔捨得, 諗落我其實都幾鬼孤寒, 哈哈! 咁講真, 呢幾樣野其實都只係玩具, 唔係話佢地唔實用, 不過就差咁d 必要性囉. 好似GPS手錶咁, 有就梗係方便d 啦, 跑o既候又可以睇倒跑左幾遠同埋步速係幾多, 跑完返屋企過返資料仲可以劃埋路線圖, 再整埋圖表做分析, 對訓練點都有幫助. 之但係冇左又冇話唔得o既, 我都有隻手錶可以計時, 不過計距離速度果d 就要自己計喇. 講到 netbook呢, 又係有又方便d 囉, 而且比起 notebook 算係平, 基本要o既野又齊晒. 不過平時屋企同公司都有電腦用, 自己又好少撘長途車, 剩係旅行公幹先用得著, 又係冇乜逼切需要喎. 至於相機嘛, 絕對係玩具啦. 有o既話, 去唔同地方玩呀, 或者出席唔同活動, 甚至係有時見倒d 靚野得意野都可以影低. 但係呢, 我又唔係話好識影相, 亦唔算係好有興趣, 仲要係毫無藝術天份, 諗落都係棧搞. 咁手提電話又點呢, 我用緊果部都差唔多用左三年, 亦真係有d 壞壞地, 有時會跳線, 但係都仲叫打得出聽得倒, 就咁換左佢又好似有d 浪費喎.
有時我就係咁麻煩架喇, 自己用果d 野, 如果唔係冇左唔得, 諗下諗下又會唔係好想買. 就好似屋企冇左部微軟視窗機差唔多成年, 最後都係冇買到. 因為唔打機o既話, 求其有部舊機, 有個OS, 有個 browser 上o下網就好夠用, 所以都費事花錢喇. 講真, 我都分唔清我究竟係孤寒定係怕麻煩呢?
又其實, 我最應該買邊一樣野呢? 又或者, 應該買邊一樣野先呢?
沒有留言:
張貼留言