昨晚上級無端端打比我, 我仲驚又唔知有乜大穫野, 點知佢打黎剩係問下d 檔案同埋目錄o既權限設定. 我就滿心奇怪, 佢一向都唔係好理呢d 野架喎, 搞乜呢? 一問之下, 原來有個無所事事專搵麻煩o既高層電郵佢, 就話系統o既保安唔掂, d 機密o既檔案竟然有普通員工睇倒喎. 我心諗, 有冇咁得人驚呀? 就算員工當中有駭客, 偷左野都唔會話你知啦. 於是我試下問得詳細d, 即係邊d 機密檔案比人睇左? 佢地原本放o係邊, 邊個同點樣放上去架? 又邊個普通員工睇倒呢? 點知我問o既問題冇人答倒我, 大佬呀! 咁你投訴都要比資料先得架? 真係冇佢地辦法. 都冇乜野可以做, 返工搞清楚件事先算啦.
不過講開又講, 好多人唔識分使用者權限同系統保安. 好, 使用者權限確實係系統保安o既一部份, 但係邊個使用者擁有乜野既權限呢, 就唔係由我地做系統o既話事, 應該係由管理層決定. 至於有權限o既使用者點樣去用佢地睇到o既野, 就更加係個人操手問題, 我地真係唔方便多事囉. 如果真係系統有漏洞, 裡面o既資料係人都睇到, 我地絕對有責任搞返掂佢, 而且你要追究都冇問題. 但係講到點解某某睇倒, 某某又睇唔倒呢d, 就唔該做管理o既人自己溝通好先, 記住, 我地只係負責執行架咋, 至於權力呀, 階級呀果d 野, 唔好搞我啦! 唔該!
沒有留言:
張貼留言