停車場

騎電單車其實好少會泊停車場, 始終細細架, 就算骨位滿左, 只要唔係好阻倒人, 通常泊埋一邊都唔會抄. 不過有某d 地方就係例外o既, 好似政府建築物, 又或者公共設施就要小心d 喇. 除此之外, 最高危就係果d 所謂有錢人o既地方, 可能佢地覺得唔順眼掛, 又或者佢地d 地方真係矜貴d 啦.

最近同朋友去圓方睇戲, 去到發覺成條街空蕩蕩, 但係就一架電單車都冇喎. 咁我地梗係唔搏啦, 而且難得圓方個停車場有電單車位, 價錢又唔係貴, 一於就泊入去威下. 講開香港d 停車場, 有提供電單車泊位o既真係少之又少, 我試過話照比私家車價錢, 佢地都唔比我泊入去呀, 真係完全唔重視我地.

不過今次泊圓方就好搞野, 佢係可以用八達通比錢o既, 點知我拍左卡果度閘都係唔肯開. 睇真d 原來我張卡比佢鎖左, 保安哥仔就走過黎問我以前有冇o係度泊過車, 應該係上次感應唔倒, 系統封鎖左我張卡. 咁我問佢點算好, 佢話閘口整唔倒架, 叫我不如用信用卡啦, 之後可以去商場櫃位解鎖. 睇阿哥仔咁順口, 我估一定好多電單車都係咁囉. 我同朋友入左去剛剛泊好車, 就見保安哥仔氣急敗壞咁追上黎, 原來今次到我朋友出事, 個系統感應唔倒佢部車, 當佢冇入到黎咁話喎. 最後, 我地兩個都係要去櫃位囉.

其實去商場櫃位就冇乜所謂, 最慘係櫃位妹妹搞左好耐都整唔返我張八達通, 果個古怪系統竟然解唔倒鎖卡, 真係激鬼死. 最好笑o既係, 我地掛住搞張卡, 竟然唔記得可以用消費單據扣減泊車費囉. o係香港渣電單車, 有冇錢都好啦, 都係比人忽視架喇!