開 email

四條友仔食緊糖水, 閒聊中...

我: 肥仔, 呢排o係屋企咁得閒, 有咩野做架?
肥: 冇呀, 睇下電視上下網咁啦.
兒: 下, 你有上網架咩? 咁你個 email 係乜? 唔駛下下約你要打電話嘛.
肥: 我冇用 email 架喎.
成: 下, 乜野年代呀, 連 email 都冇?
我: 係囉, 開翻個啦, 我地通常都係用 email 約人, 咁樣方便d 嘛.
肥: 好啦好啦!
我: 唔係喇, 而家即刻開啦. 你返去實冇左件事.

我懶醒咁拎部電話出黎, 開個 browser 去 gmail 然後比肥仔自己入資料. 點知肥仔搞左好耐都係開唔倒喎, 唔係打錯字就係拑錯制, 我都明白電話個 input 唔係咁易習慣, 咪搶返個電話諗住幫佢開囉.

首先我幫佢入晒一般資料, 再入埋個認證碼, 跟住咪比返佢入密碼囉. 佢入完密碼之後, 我望望應該冇問題就按確認啦. 點知彈返轉頭, 話密碼不能空白喎. 我即係噓阿肥仔啦, 叫佢再入過密碼然後再確認. 點知都係唔得, 今次就話要輸入認證碼, 原來每次失敗都要再入過架. 入完個新o既認證碼, 再望清楚, 咦? 密碼果兩行又變返空白喎. 頂! 原來每次衰左, 密碼又係要入過.

我諗咁唔係辦法, 都係等我幫佢注冊左先, 之後再改返密碼啦. 我入晒所有野, 又按確認啦. 天呀! 又唔得? 乜話? 密碼太簡單? 好! 好! 今次入得複雜d, 有字有符號. 噢! 又要再入認證碼, ok ok. 再按確認. 搞乜呀? 又衰左? 下? 密碼最少八個字? 好啦好啦, 再黎, 咦? 又唔得? 前後密碼不符? 不符? 玩咩? ... ...

冷靜d 冷靜d, 然後續隻字好小心咁再入一次. 終於得左, 雖然已經好想打人, 但總算可以鬆一口氣. 成功 login 之後就諗住叫肥仔改密碼啦, 點知搵黎搵去都唔見有得改喎. 阿成頂我唔順搶左去搵, 但係佢唔係好識用, 結果搞到變左白畫面又畀返我. 如是者又搞左一大輪我先發現, 我地睇緊o既係 mobile version, 唔怪得冇晒d function. 轉返正常版之後, 終於成功改倒密碼. 哈哈, 收得工喇.

就o係呢個時候, 阿成話: 唔係喎, 肥仔你 login 一次試下穩陣d 喎.

咁我咪再比個電話肥仔試下囉, 肥仔按左一輪, 一臉疑惑. 我地裝下佢搞乜啦, ... ... 頂! 密碼不正確!!!

(我真係冇諗過開個 email 會咁辛苦, 原來有d 野當你習以為常之後, 你會完全唔記得其實佢係幾咁複雜.)