入錯門口

上個週末本來打算出去食午飯, 點知o係屋企坐下坐下唔多想郁, 結果到出門口o既時候已經變左要食下午茶. 行行下入到間日本麵店, 見有好幾款下午茶餐, 睇落都算抵食. 茶餐有個麵做主打, 撘一份小食, 仲連埋餐茶, 都係三十幾蚊. 於是叫左其中一款, 然後一邊睇書一邊等食, 不知幾咁悠閒.

正當我看得入神, 突然聽到"嘖嘖"幾聲, 抬頭一望, 原來係由一位嬸嬸發出o既. 跟住我聽倒佢細細聲, 以好不屑o既聲音重覆果句服務員一見有客人就會講o既日文, 我估佢係想話人地讀錯掛. 我心諗, 唔駛咁執著呀? 唔通佢教日文o既?

咁橋呢, 阿嬸嬸被安排坐o係同我連住o既隔離檯, 睇佢個樣就唔多願架喇, 不過當時都幾多人, 冇法啦. 過左一陣佢開始點菜, 我聽倒佢問侍應個餐o既小食係乜(其實餐牌有寫), 然後又問可唔可以轉. 咁d 野跟餐架嘛, 點轉比你呢? 之後又話自己唔食得生野, 要熟o既, 可唔可以要乜乜. 侍應就話轉熟食可以, 不過都係冇得揀, 剩係得跟餐果款. 佢見無得搞, 就好不滿咁話: 就咁啦. 人地問佢餐飲要乜, 佢又問返人地有乜(又係餐牌有寫架). 之後就好誨氣咁要左個檸水. 侍應走開之後, 我聽倒佢細細聲咁話: 乜野都話唔轉得, 點做生意架.

我發覺現在越來越多這類麻煩客人, 其實三十幾蚊個餐, 想點呢? 茶餐款式一早就定好晒, 樣樣都比你轉就唔係果個餐啦. 唔好以為比錢就大晒先得架, 人地都係打份工, 間舖都係做生意, 唔係話要就晒你架喎. 總覺得而家d 人要求多多, 都唔諗下係乜野場合, 想要o既野合唔合理. 講真, 冇人逼你入去食野架喎, 呢間亦唔係乜野高級食肆, o係唔同地方自然係有唔同o既服務水平, 而你所比既錢, 亦都好唔同啦, 係咪?