危機四伏

傳聞又來了, 聽說, 這個月又再次有危機, 怎麼好像永遠沒有完? 在這種不安穩的環境下工作, 真叫人提心吊膽, 亦令人十分洩氣. 每天, 大家還是非常忙碌, 企劃開完一個又一個, 機器不停運轉, 會議開個沒完. 難道這些都是假象? 還是, 這一切都只是在自欺欺人? 又或者, 其實我有思覺失調.

說真的, 做一日和尚念一天經, 在沒事發生之前, 我們有工作倒是十分正常的事. 怪只怪上面的人總要故作神秘, 我們只好胡亂猜測, 現在根本是亂作一團, 即使再努力, 到最後恐怕也只是白費氣力.

多想無益, 希望在明天啊!

大遷徙

傳聞已久的大遷徙終於展開, 幾經討論幾次變卦, 結果卻在毫無徵兆下勒令執行. 不過, 這也近乎變了常態, 可能他們真的相信, 沒計劃才是最好的計劃那種癈話. 再說, 麻煩了的只是我們支援部隊, 又有誰會去理我們的感受.

但見桌上椅上手上地上, 大箱小箱隨處亂放, 房內房外樓梯走廊, 雜物擺滿各式各樣. 大家趕緊收拾行裝, 可是行李實在太多, 竟塞滿整個公司大堂, 真不知他們平時究竟怎樣收藏.

回望空出了的地方, 處處塵土飛揚, 東歪西倒的桌椅門牆, 加上被棄置的殘餘物資, 看上去真像個戰場. 這個景象, 即使不叫屍橫遍野, 也是滿目瘡痍了.

國之將亡

這種時候是不是真的必有妖孽, 我不知道, 但要說妖孽, 也不是今時今日才出現吧. 冰封三尺, 非一日之寒, 亡國之因也不可能是一朝一夕的事. 當然, 妖孽橫行已久, 為禍亦深, 但歸根究柢, 還是主子無能, 揮霍無度, 才會弄至如斯田地. 再多的妖孽, 也不過是加快國運的衰敗, 以及加深其禍害而已.

彌留之際, 謠言特別多, 多少真多少假也很難說清楚. 有些是無心之失, 有些是胡亂猜測, 更有些是刻意洩漏, 想看看大家的反應才作決定吧. 對於這些, 我已沒多大反應, 敗局已成, 與其花時間擔心這些微末小節, 不如好好想一想, 自己想要怎樣的一個以後.

不想成為亡國奴, 難道就只有逃走?

最後階段

終於到了最後階段, 活動一個接一個, 同事們興高采烈, 開幕, 進場, 看戲, 晚宴, 酒會, 忙個沒完. 我隨著人群, 每一樣也有參與, 拍掌時用力拍掌, 叫囂時一同叫囂, 呼叫時一起呼叫, 只是腦內一片空白, 也不知是痴了, 還是醉了.

電影院裡放著片子, 一切都來得非常急速, 突兀的黑沒有留白, 還沒來得及消化, 故事便已完了. 走馬燈的字, 有點花, 也有點亂, 試著整理還是不明所以. 還幸在電光火石之間, 也能找到自己的名字, 總算是有點安慰.

能夠走到今天可說殊不容易, 管理層一轉再轉, 故事改完又改, 設定每天也在變, 人事混亂, 資金短缺, 出糧也試過出事. 期間有人受不了離去, 也有人繼續堅持, 到了某天, 甚至連老闆也退下了火線, 那又怎叫人不心驚膽顫. 雖然經歷風風雨雨, 最後, 總算是完成了. 本來, 這該是多麼高興的日子, 也許因為發生了太多事, 我實在不能開心地笑.

現在大家都等待著成果, 前面是未知之數, 努力了不一定會成功, 不試過又不知道結果. 只是, 既然控制不了, 倒是不用太在意, 大不了也不過是從頭開始. 只要記著, 我們曾經一起為夢想奮鬥過, 那便已經很有意義.

這是工作

凌晨三時, 手提電話鈴鈴鈴的響起來, 睡意正濃還未意識到是甚麼事, 朦朧間更像是上堂的鐘聲在響過不停. 在夢裡, 彷彿回到往年, 同學們都安坐在教室裡, 正等待著老師到來. 四周是一張張熟悉的臉, 見到的只有歡笑, 心裡不覺溫暖起來. 吵耳的鈴聲再次傳來, 忽然清醒, 不得已爬下床來, 找起電話. 來電顯示為未知號碼, 不禁一凜, 人更是清醒得多.

是外國同事的來電, 傳輸系統出現問題. 沒說半句癈話, 立即開始工作. 十餘分鐘後找到問題所在, 修復, 還原, 還得電郵解話. 半小時後總算完滿解決, 輾轉反側卻那能立即入睡, 數小時後又得準時上班, 那又怎會夠精神? 這, 就是工作.

話說回來, 今次的系統問題本不該是緊急任務, 可惜本地同事遇事不察, 又不向我們查問. 結果要到外國同事上班, 臨急致電求救, 才會有夜半找支援的事情. 可以怎樣? 說也說了, 警覺性卻不是說有就有的. 我說嘛, 這, 也是工作.

赤柱午餐

昨天公司的製作部門放假一天, 但是行政部, 財務部等卻照常運作, 作為支援部門的我們自是不能例外, 只好照常上班, 繼續為僅有的同事們提供服務.

雖然要返工, 不過這天在公司的同事還不到平時的十分之一, 可想而知工作也不會多到那裡去. 其實這樣上班也不錯, 除了難得的清靜, 工作清閒, 感覺舒適以外, 還可以做一些平常難有機會的動作, 像是關掉侍服器或搬動大型機器等等.

雖然這樣工作不算辛苦, 但在大部份同事放假的日子上班, 心裡始終有點耿耿. 為了在心理上作點補償, 我們決定駕車到赤柱來個悠閒午飯. 一時左右出發, 在赤柱廣場會合, 望著藍天白雲, 心情也變得輕鬆起來, 大家都興奮得在那裡走來走去就像遊客一樣. 最後, 我們選擇在美利樓午膳, 這一吃便吃到三點多, 有夠厲害. 幸好有經理級同行, 自是不用怕那麼多.

偶爾如此, 實在不錯. 當然, 如果每天也是這樣, 那就真叫人擔心了.

假日工作

昨天雖然是星期日, 但是卻不能放假, 因為前陣子儲存器壞掉了的叢集集線器終於送來了, 我們要盡快把它換上. 由於更換此裝置必須關掉檔案侍服器, 為了盡量減低對同事們的影響, 安排在放假的時候是最為穩妥. 事實上, 除了不想阻礙同事工作以外, 我們也可以多作點準備, 另外, 即使更換過程中出了甚麼意外, 也會有更多的時間去補救.

我們維修人員的工作就是這樣, 無可避免地有些項目要在無人的時候才可以做, 這應該算是工種的先天特點吧. 所以有朋友問我加班有沒有甚麼補償時, 我通常都只是笑而不語. 或許是我習慣了吧? 也或許是我認命吧? 從當起維修員以來, 每一份工都需要在公司休假時工作, 並且要求我們隨時應付突發事件. 我想, 這些也是工作範圍吧. 而且, 見工時老細好像都有問我會否介意加班工作, 不用想也知道我是怎麼回答吧.

話說回來, 今次的工作我有少許覺得無謂, 因為儲存器即使不更換部件, 也是在正常運作的. 這樣說吧, 以硬件規模計算, 系統的效能是稍稍降低了, 但是對實際工作的影響應該是微乎其微. 不過使用者就是這樣, 你不說他們就不覺得怎樣, 你告訴他們理論上會慢了, 他們便會覺得一切都變得很慢, 慢得簡直是不能工作. 沒法子, 即使我覺得有點費時失事, 但是能讓同事們安心, 也算很有價值了.

唯一我沒說的是, 更換部件後, 我竟沒發現效能有所提升呢!

還是會有壓力

今天公司的主儲存器因內部叢集連環失效而無法運作, 基本上沒了它就等如沒法工作, 因為差不多所有工序都需要對它進行讀寫. 事件一發生, 我部門便立即嘗試修復, 可惜部份硬件已經返魂乏術, 同時某些部件又無法相互聯繫, 令到整個維修過程困難重重. 由於問題過於複雜, 我也沒有甚麼頭緒. 看著數十台壞掉的機器, 以及千絲萬縷的網絡連線, 還有那幾個半死不活的集線器, 我竟不其然緊張起來. 原來, 我還是會感到壓力.

對於不能掌握的狀況, 我難免會感到害怕. 既想不到辦法, 又找不到人幫忙, 那一刻竟是如此地無助. 大著膽子去試, 卻是一步一驚心, 只怕會把事情弄得更糟, 但是不去管它又不是辦法. 每一個決定都是這麼難下, 每一個方法都似乎是個笑話, 怎麼做內心都覺得驚怕.

經過數小時的奮戰, 問題最後在減低侍服器效能, 及更換部份硬件後得以暫時解決, 不過仍有很多附加服務無法運行. 但是, 總比完全不能使用來得好吧. 我現在只希望, 這種緊急措施能夠應付每天的工作量, 否則的話, 也真不知怎麼做才好.

推銷

公司曾經購買一些大廠的硬件, 由於選購過程需要對不同廠商的產品進行比較, 因此我們與各大廠商也建立了聯繫. 自此以後, 各廠商不時會有一些推銷員(或曰戶口經理)上門推銷, 美其名是有新產品介紹, 實則是看看有沒有生意.

本來, 聽他們介紹一下新技術, 看一下新科技也沒甚麼所謂, 一則大家也是在工作, 再則新產品會很合用也說不定. 只是, 有兩種推銷員我很不喜歡, 其一是那種很沒信心, 說話詞不達意, 對自己的產品既不熟悉, 對顧客的提問又不懂解答. 這樣的會面, 無疑是浪費大家時間, 即使他介紹的產品有多厲害, 在客戶眼中都已經大打折扣.

至於另一種, 就是太有自信, 盛氣凌人, 說到產品天花龍鳳, 著意硬銷. 偏偏又不認識客戶行業, 不考慮環境是否適合, 更不理會是否切合顧客的需要. 即使客戶提出一些顧慮, 他依然在那裡自說自話. 說真的, 不論產品有多先進有多好用, 要是顧客用不著, 那又有甚麼作為?

其實, 上門前先做一些資料搜集又有多難? 先了解客戶的需要, 再選擇合適的產品作介紹不是更好嗎? 又不是一次過要推銷過百樣貨品, 好好溫書給大家一個好印象, 相信對銷售也會有幫助啊. 現今社會, 已不是造了一件貨品, 顧客買了就能夠安心使用. 新舊系統的配合以至交替, 對現有流程的改動, 以及售後服務與支授, 這些都會影響購買意欲. 請試試對你的客戶多點了解, 多點關心, 做推銷也要做得夠專業啊!

只想安心工作

工作上, 我一向很怕那些是是非非, 甚麼爭權奪利, 真是一點興趣也沒有. 公司不算大, 又不怎麼賺錢, 都不知有甚麼好爭的. 但這種權力鬥爭可說無處不在, 有很多人更是樂此不疲. 要命的是, 在這個資訊掛帥的年代, 每當有人事變動或政策改變, 我部門往往首當其衝. 有人會著意攻擊, 有人想安插親信, 也有人想直接把我們收歸旗下, 麻煩的事無日無之, 煞是討厭.

工作上的問題已夠令人頭痛, 偏有人不務正業, 只愛出風頭扮代表, 把問題弄得越加複雜, 唯恐天下不亂. 那些誰對誰錯, 好人壞人的故事已經聽的太多, 有時間說三道四散播謠言, 不如做些實質事情有益身心. 現在的經濟環境社會氣氛還不夠差嗎? 別要再讓人更加心煩, 好嗎?

兵荒馬亂, 人心惶惶, 要獨善其身, 做個快快樂樂的技工還真不容易. 其實, 我只不過是想做好我的事.

預算

在這樣的環境下, 竟然可以如此計預算, 而且還分三個層次, 究竟是他們過份天真還是只有我太過杞人憂天? 為甚麼這樣說? 本來做甚麼計劃, 都好應該有個預算, 只是他們不考慮現實情況, 機器要最快的, 軟件要最新的, 技術要最好的, 那就未免有點不切實際.

三個層次所要的資源是現在的二至八倍, 即使最低那一層, 要更新的軟硬件已是驚人數字. 要知道牽一髮動全身, 即使只是更換某隻軟件, 也會關係到硬件的支援度, 作業系統的相容性等等. 至於某些先進技術, 除了其本身所需而要添置設備之外, 更要求增加大量儲存空間. 又由於不想延長製作時間, 總計算能力亦必須與以提升, 這意味著更多的機器會投入生產線. 有趣的是, 加入更多機器既需要空間, 也要更強的空氣調節, 當然更大的電力也是少不免. 為甚麼這些關係, 他們都好像看不見?

怎說也好, 我還是會協助計算, 只希望結果不會是天文數字, 免得嚇壞了這些新朋友. 不過, 如果他們真的願意玩下去, 那倒是非常有趣.

工作範圍

這幾年, 公司換了好幾次高層, 不是一個半個的轉換, 而是整個班底的換血. 至於為何如此, 我亦無謂妄下判斷, 事實上, 作為一個小職員, 所知的也實在不會多. 有趣的是, 新血們都有一個共通點, 就是每次上場, 都會叫大家交一份自己崗位的工作範圍, 看來他們對每個職位都很有興趣吧. 我只是不明白, 都交了這麼多次, 難道通通都沒有存底嗎?

其實寫這個沒甚麼大問題, 不過是把每天的工作歸類總結, 再用比較正式的文字概括地描述一下就成. 只是我們維修這工種, 基本上與雜工無異, 除了一般電腦維修, 似乎所有用電的東西都和我們有關. 甚麼更換燈膽, 影印機食紙, 錶箱跳電, 冷氣漏水, 冰箱唔夠凍都會呼叫我們. 我常常會想, 幸好升降機是大廈物資, 否則攀爬機槽實在是少不了. 又不知是不是同事們看來孔武有力, 那些搬搬抬抬, 裝裝拆拆的工作, 總會預我們一份. 再加上我們有輪班工作, 假日時還得充當公司保安, 保管大門鎖匙. 可惜的是, 這些都不能也不應寫進報告裡, 要別人明白我們真正的工作, 也實在不太容易.

我倒覺得做雜工沒有所謂, 能夠幫忙同事, 大家也覺開心. 只是不要凡事老馮, 始終我們正職是電腦維修, 樂意幫忙是一翻好意, 要把那些納入工作範圍卻是萬萬不可以.

失竊事件

今日有同事發現佢檯頭部手提電腦唔見左, 問過應該唔係其他同事借左去用. 咁唯有翻查閉路電視, 睇下有冇d 乜野發現啦. 講開就真係有d 瘀, 因為我地竟然冇人知個 cctv系統係點用o既, 唯一有份整果位同事又剛巧放左假. 不過好彩, 最後都搵到d 舊檔案黎睇, 但係就要辛苦行政部o既同事慢慢嘆喇.

煲劇一個上午之後, 行政部同事發覺有兩個人好可疑, 佢地o係中午食飯時間出現, 其中一個有背囊o既入左唔見野果間房, 而另一個呢就企o係出面, 貌似把風. 睇樣呢, 就應該唔係我地o既同事, 真可怕.

大家一定好奇怪, 如果唔係自己人, 又點可以入倒我地公司偷野呢? 其實行入我地公司真係話都冇咁易, 因為午飯時候, 唔知係貪方便定係為左d 乜, 有同事總係喜歡大開公司o既中門, 咁樣大開方便之門, 有賊睇中一d 都唔出奇囉. 其實行政部已經話過同事好多次, 仲曾經出過通告, 可惜大家都係唔聽, 有乜辦法丫. 而家終於出事, 真係都唔知講乜好.

都係果句啦, 乜鬼保安系統都好, 最大o既漏洞始終o係用o既人度.

黃昏系統

之前提過公司個IM 古古怪怪, 不定時就會有一大堆同事斷線, 真係好煩. 經過上次o既臨床實驗, 其實都搵唔倒個問題o係邊, 不過就應該唔關個廣播功能事, 咁果位最似兇手o既同事都幾無辜, 真係要講聲對唔住喇! 講真, 由於廣播功能一早已經設限, 基本上係唔能夠一次過令好多人死程式o既, 所以真係要從新想一想調查o既方向.

只可惜臨床實驗後我開始放假, 暫時唔可以再跟進落去, 唯有叫同事們頂住先啦, 始終IM 又唔係必要o既系統, 冇左都唔死得人o既, 而且都唔可以話係冇左丫. 點知放假途中看電郵, 同事話好難頂喎, 仲話唔知係咪關程式版本o既事. 唉! 點解又係咁架? 次次有問題唔係賴版本唔夠新, 就係話部機慢. 根本都唔係去解決個問題o既.

其實我臨走前都有些少概念, 估計問題應該同果d 離線訊息有關. 我亦向有關部門同事提過, 叫佢可能o既話, 就試下清晒佢地. 我估佢應該冇咁做啦, 於是我叫同事唔好混淆視聽, 直接走去封鎖晒d 離線訊息, 睇下有冇改善.

放完假返來, 一問之下, 真係冇事喇喎. 照咁睇, 應該係某同事o既離線訊息含有古怪字元, 其他同事一收到就會死程式. 講真, 發現呢d 問題呢, 應該試下搵出係乜野字元導致問題, 然後修改程式以避免同類事件再發生. 之但係, 呢個IM 系統其實已經好舊, 我地都打算o係現有企劃完結後將佢升級, 實在唔想花太多時間精神o係呢d 黃昏系統身上. 既然而家仲用倒, 都係頂住先啦. 辛苦晒大家!

奇怪事件

公司個 IM 前幾日起出現一d 怪現象, 就係時不時就會有一堆人斷線. 本來斷下線冇乜所謂, 因為我地o既預設係會自動重新連線, 理論上唔會有太大影響. 最慘係個程式唔止斷線咁簡單, 係直頭死左, 連屍都唔留返一條.

同事就梗係嘈晒啦, 想搵人時隨時個個都變晒離線, 真係搵倒就奇喇. 最奇怪係, 我地果組完全冇咁o既情況, 所以我地一直都唔知, 直至同事打上黎叫救命先至如夢初醒. 做維修最怕係乜? 就係呢d 唔係個個死, 唔知點解死, 唔知幾時死, 同唔係次次死o既問題. 剩係要搵個原因出黎就已經好困難, 都唔好話整返好佢喇.

點講都好, 始終要做. 開頭先睇下d 日誌先啦, 發現呢個問題係星期二早上先開始出現o既, 循例問下各同事果日有冇搞過d 乜, 得倒o既當然係標準答案 -- 乜都冇搞過. 咁我就好衰o既, 都會查下d 登入記錄, 指令日誌咁, 又真係唔覺有乜特別野. 跟住可以點做? 就係收集所有可以見得到o既現象, 然後嘗試從中整理出一d 可能性出來. 呢個過程好痛苦, 而且好漫長, 仲要好多時都係估唔中, 諗錯左. 搞左成日, 其實我都未肯定個問題出o係邊度.

不過咁, 我地唔可以乜野都唔做. 由於事件似乎同廣播事件有d 關係, 又主要集中o係某d 部門. 於是我地唯有搵左個最似兇手o既同事, 整下佢部機, 安撫下d 人咁囉. 有時就係咁架喇, 我地連心理都要照顧埋架.

至於呢單野, 就梗係唔會就咁算啦. 但係我部門根本冇出現呢個問題, 又模擬唔倒個現象, 唯一方法就係做臨床實驗, 人我都約左架喇, 希望聽日順利搵倒個問題啦.

無聊的工作 IM

同事M : 廣播 - 由於一月五日發出之檔案傳送指引有所不足, 請加上
香港傳送至美國 - HK:/mnt/project/lib/ref -> US:/mnt/project/lib/ref
兩地互傳 - HK:/mnt/project/prod <-> US:/mnt/gman/prod

我 : prod 應該是採用直接聯接的.

同事M : 呀, 對, 你說得對. 我會提醒大家.

[隔了一會 ...]

同事M : 現在 ref 會不會也是直接聯接?

我 : 不會吧, 他們好像用不著. 我查一查吧.

同事M : 應該一定要用 ref 架喎.

我 : 那麼, 就應該是直接聯接了.

我 : find /remote/server/project/lib/ref
/remote/server/project/lib/ref/pic
/remote/server/project/lib/ref/mov

[再隔了一會 ...]

同事M : prod 不是"直接聯接的"! US 提交檔案後, 香港需要使用, 我覺得是互相傳送.

我 : 不是呀! 是直接聯接!

我 : find /remote/server/project/prod
/remote/server/project/prod/items

同事M : prod 有來自兩方面的檔案喎!

我 : 我只是告訴你事實吧了.

同事M : 會不會是, US 採用直接聯接, 直接把檔案寫到這邊?

我 : ... 我不是一開始就告訴你嗎? 而你突然說 "prod 不是直接聯接的", 現在, 你又同我講返同一樣野?

(真係唔知講乜好了...)

不可思議

究竟真相係點架呢? 今次我真係查唔出, 恐怕都要變成玄案架喇, 唉! 其實件事都幾奇怪, 朝早有同事打電話黎話唔見晒d 檔案, 我去佢講o既路徑睇睇, 發覺真係乜野都冇喎. 最邪就係呢個路徑所屬o既專案比較特別, 所以冇設定備份, 因此我冇辦法對下冇左d 乜. 而更奇o既係, 我發現而家果條路徑o既檔案, 無論日期時間數量都好似當日剛剛開專案時咁樣. 照咁睇, 今次唔係比人刪除左野, 而係有人做左一d 奇怪行為.

我再查下之前存儲器o既使用量, 就更肯定有人做左手腳喇, 因為之前兩個月o既記錄, 可以證明呢個專案係不斷有增加使用量o既. 然後再細心看看每個目錄, 我發現o係出事o既時間多左兩個古怪目錄, 另外, 就係呢個專案o既結構檔曾經被修改, 並且已經被刪除. 再翻查結構檔備份, 發覺其內容被修改得極不合理, 而且, 若果o係檔案侍服器運行該錯誤修改o既結構檔, 確係有可能將資料刪掉. 但係, 最離奇o既係, 如果資料真係因為咁樣而被刪除, 殘留o既樣子又應該唔會係而家咁架喎.

可是, 我雖然有一d 遠端用戶登錄, 以及部份執行程式o既記錄檔, 但係咁樣並唔足以確定出事原因. 遍問同事, 仍然毫無頭緒, 始終電腦記錄只可以作為參考, 加上當中亦無任何直接刪除檔案o既語句. 大家話冇做過, 都唯有係當撞鬼o既o者.

不過, 今次真係好對唔住同事囉, 希望影響唔算好大啦. 唉!

尋寶遊戲

工作上有樣野一定要做, 做就冇乜問題, 但係最怕做完之後會遇到o既麻煩. 呢樣工作就係資料備份與保存(data archive, ...唔知點譯好), 唔係講緊平日o既資料備份喎, 我地對日常使用中o既資料有三層備份, 包括有每日兩次近線(nearline)保護, 每星期磁帶備份及一份遠端資料備份. 至於 data archive 係做乜呢? 其實就係將一d 舊 project 整理好, 刪除晒d 無用既野, 然後成份儲存落磁帶作長時間保存. 咁之後就可以o係主儲存器刪除有關o既 project, 放翻磁碟d 位出黎用.

基本上呢個工作都好正常, 但係最大o既問題係d 同事就好鐘意o係個 project archive左之後好突然咁醒起有d 野好有用, 然後就話要我地幫佢搵返出黎. 本來備份及還原都係基本工作, 最大o既問題係同事係唔會記得佢要o既野實質上o係乜野位置, 亦唔會記得d 檔案叫乜野名. 結果呢, 每次都好似尋寶咁, o係一大推檔案裡面搵, 又要估下可能放o係邊, 又要估下叫乜名. 最慘係還原檔案係好花時間架, 仲要搵地方放, 簡直係費時失事. 而當中最得人驚o既係同事想搵o既野原來o係整理過程中自己刪除左, 大家忙完一大輪都唔知為乜囉.

其實呢, 主儲器有個地方比同事放一d 有普遍性o既重要野. 係唔明點解佢地唔可以o係 archive 之前將d 可以作為參考o既資料留低, 硬係要等心血來潮先醒起, 然後又好急咁要你搵返比佢. 唔通, 邊d 野有用, 邊d 野冇用真係咁難分?

垃圾儲存器

公司用緊o既主儲存器好快就會滿, 同生產部阿頭講左好幾次, 但係佢都冇乜反應, 都唔知點算好. 講真, 我真係做唔倒d 乜野, 唔夠位呢, 就得兩個方法, 一係就加碟,一係呢就係清左d 冇用或者冇乜用o既檔案. 就咁, 而家咁o既時勢, 加碟呢就應該都係唔駛諗架喇; 至於刪除檔案, 就當然係比較實際, 而且刪除d 冇乜用o既野都好合理丫, 我地真係無理由比錢儲垃圾架嘛. 即係, 好似屋企好多雜物, 正路都係大掃除, 將d 冇用o既野掉左佢, 斷唔會話走去買間大屋黎裝野架. 最大問題係, d 檔案係生產部整出黎o既, 叫佢地刪除唔係闊佬懶理, 就係話連佢地都唔知邊d 野有用. 我又唔敢幫佢地清左d 無更新, 好舊, 好少用o既檔案喎, 如果佢地突然話要睇咪好大穫? 不過, 咁都唔係辦法架, 到時個儲存器爆左, 大家就真係只可以坐晒o係度.

有時真係好唔明佢地點搞o既, 自己整o既野都可以唔知邊d 要邊d 唔要, 一個完成品幾十個版本, 仲話全部都要保留喎, 多多位都頂唔住啦. 其實呢個道理好易明, 好似屋企部機咁, 裝左太多野唔夠位, 你都會刪除d 冇咁緊要o既野啦, 係唔知點解返到公司, 個諗法會完全唔同晒囉.

冇架, 講就講左架喇, 再係咁落去, 都捱唔倒幾耐, 到時咪又係要搵野刪除. 唉! 我o既工作係唔希望出左事先黎救, 只係條命o係人地手上, 佢地係要衰左先搞, 我除左不時警告一下, 都只係可以望住佢死架姐.

只希望唔好死得太慘啦!

使用權限

昨晚上級無端端打比我, 我仲驚又唔知有乜大穫野, 點知佢打黎剩係問下d 檔案同埋目錄o既權限設定. 我就滿心奇怪, 佢一向都唔係好理呢d 野架喎, 搞乜呢? 一問之下, 原來有個無所事事專搵麻煩o既高層電郵佢, 就話系統o既保安唔掂, d 機密o既檔案竟然有普通員工睇倒喎. 我心諗, 有冇咁得人驚呀? 就算員工當中有駭客, 偷左野都唔會話你知啦. 於是我試下問得詳細d, 即係邊d 機密檔案比人睇左? 佢地原本放o係邊, 邊個同點樣放上去架? 又邊個普通員工睇倒呢? 點知我問o既問題冇人答倒我, 大佬呀! 咁你投訴都要比資料先得架? 真係冇佢地辦法. 都冇乜野可以做, 返工搞清楚件事先算啦.

不過講開又講, 好多人唔識分使用者權限同系統保安. 好, 使用者權限確實係系統保安o既一部份, 但係邊個使用者擁有乜野既權限呢, 就唔係由我地做系統o既話事, 應該係由管理層決定. 至於有權限o既使用者點樣去用佢地睇到o既野, 就更加係個人操手問題, 我地真係唔方便多事囉. 如果真係系統有漏洞, 裡面o既資料係人都睇到, 我地絕對有責任搞返掂佢, 而且你要追究都冇問題. 但係講到點解某某睇倒, 某某又睇唔倒呢d, 就唔該做管理o既人自己溝通好先, 記住, 我地只係負責執行架咋, 至於權力呀, 階級呀果d 野, 唔好搞我啦! 唔該!